विंझर वार्ताहर समीर कांबळे
शिवछत्रपती कला व वाणिज्य महाविद्यालय आणि सावित्रीबाई फुले पुणे विद्यापीठ यांच्या संयुक्त विद्यमाने मोजे निगडे (मोसे), ता. वेल्हे येथे आयोजित करण्यात आलेले राष्ट्रीय सेवा योजना विभागाचे विशेष हिवाळी श्रमसंस्कार शिबिर नुकतेच संपन्न झाले. दि. ८ ते १४ फेब्रुवारी २०२६ या कालावधीत पार पडलेल्या या शिबिरातून विद्यार्थ्यांनी समाजसेवेचा नवा आदर्श निर्माण केला.
स्वच्छता आणि जलसंधारणावर भर
या सात दिवसांच्या शिबिरात गावामध्ये विविध सामाजिक उपक्रम राबवण्यात आले. प्रामुख्याने ‘प्लास्टिकमुक्त गाव’ ही संकल्पना राबवत संपूर्ण गावाची स्वच्छता करण्यात आली. तसेच पडीक जमीन व्यवस्थापन, जलसंधारण आणि पाणी पुनर्भरण यांसारख्या महत्त्वपूर्ण कामांना प्राधान्य देण्यात आले. ग्राम स्वच्छता मोहिमेत महाविद्यालयीन स्वयंसेवकांसोबतच ग्रामस्थांनीही उत्स्फूर्त सहभाग नोंदवला.
मान्यवरांचे मार्गदर्शन
शिबिरासाठी पी.डी.सी.सी. बँकेचे संचालक व संस्थेचे कार्याध्यक्ष माजी नगरसेवक विकासनाना दांगट पाटील, संस्थेचे सचिव डॉ. सुधाकर जाधवर यांचे विशेष सहकार्य व प्रोत्साहन लाभले. महाविद्यालयाचे प्राचार्य प्रा. लक्ष्मण कांबळे आणि संस्थेचे समन्वयक नंदुभाऊ जगताप यांच्या मार्गदर्शनाखाली शिबिराचे नियोजन करण्यात आले.
कार्यक्रमात विद्यार्थ्यांना विविध विषयांवर तज्ज्ञांचे मार्गदर्शन लाभले:
इतिहासकार दत्ताजी नलावडे: ऐतिहासिक वारसा आणि सामाजिक जबाबदारी.
डॉ. नितीन मोटे: आरोग्य आणि युवाशक्ती.
अविनाश राठोड व नितीन ढमाले: शेती आणि मृदसंधारण.
गावडे मॅडम (केंद्रप्रमुख): शिक्षण आणि प्रगती.
प्रबोधन आणि अध्यात्म
शिबिरादरम्यान केवळ श्रमदानच नव्हे तर वैचारिक प्रबोधनही झाले. ह.भ.प. ऋतुजा पोकळे महाराज यांच्या हरिपाठाने शिबिरात आध्यात्मिक चैतन्य निर्माण झाले.
समन्वय आणि यश
हे शिबिर यशस्वी करण्यासाठी राष्ट्रीय सेवा योजनेचे कार्यक्रम अधिकारी प्रतीक्षा गोळे, तुषार ब्रम्हे, प्रज्ञा दिघे आणि डॉ. सुरेश शहापुरे यांनी अथक परिश्रम घेतले. निगडे गावचे सरपंच, उपसरपंच, ग्रामसेवक आणि जिल्हा परिषद शाळेच्या शिक्षकांचे या उपक्रमाला मोलाचे सहकार्य लाभले.
विद्यार्थ्यांच्या या कार्याचे वेल्हे तालुक्यात सर्वत्र कौतुक होत आहे.
