राजगड पोलिस ठाणे सध्या कायदा व सुव्यवस्थेच्या रक्षणासाठी नव्हे, तर गंभीर आरोप आणि चर्चांमुळे चर्चेच्या केंद्रस्थानी आले आहे. काही दिवसांपूर्वी राजगड पोलिस ठाण्यातील एका पोलिस कर्मचाऱ्याचा कथित दरोडा प्रकरणाशी संबंध असल्याची बाब समोर आल्यानंतर पोलिस यंत्रणेच्या कार्यपद्धतीवर प्रश्नचिन्ह निर्माण झाले होते. त्यानंतर आता याच पोलिस ठाण्याच्या हद्दीत सुरू असल्याच्या कथित अवैध व्यवसायांमुळे पुन्हा एकदा पोलिस प्रशासनाच्या भूमिकेवर नागरिकांकडून संतप्त सवाल उपस्थित केले जात आहेत.
शिंदेवाडी, शिवापूर आणि चेलाडी परिसरात काही कथित अवैध व्यवसाय सुरू असल्याची चर्चा नागरिकांमध्ये आहे. ‘साहेबांच्या मर्जीतला’ असल्याचे सांगितला जाणारा एक स्वयंघोषित पत्रकार आणि काही पोलिस कर्मचाऱ्यांच्या कथित वरदहस्तामुळे या व्यवसायांना अभय मिळत आहे का? असा गंभीर सवाल नागरिकांकडून उपस्थित केला जात आहे. मात्र, या आरोपांची स्वतंत्र अधिकृत पुष्टी झालेली नाही.
जर परिसरात अवैध व्यवसाय सुरू नसतील तर पोलिस प्रशासनाने त्याबाबत स्पष्टता द्यावी आणि जर नागरिकांच्या तक्रारींमध्ये तथ्य असेल, तर संबंधितांवर कठोर कारवाई का होत नाही, असा प्रश्न उपस्थित होत आहे. अवैध व्यवसाय करणाऱ्यांना नेमके कोणाचे पाठबळ आहे? कारवाई करण्यास प्रशासन का धजावत नाही? या प्रश्नांची उत्तरे आता नागरिकांना हवी आहेत.
विशेष म्हणजे, प्रभारी अधिकारी रुजू होऊन काही दिवसच झाले असताना हद्दीतील कायदा व सुव्यवस्थेच्या परिस्थितीबाबत नागरिकांमध्ये अस्वस्थता वाढल्याची चर्चा आहे. अल्पावधीत गंभीर स्वरूपाच्या गुन्ह्यांच्या घटना घडल्याचा दावा केला जात असून, काही नागरिकांकडून सुमारे पाच खून आणि दहा गंभीर हल्ल्यांच्या घटनांचा उल्लेख केला जात आहे. या आकडेवारीला अधिकृत दुजोरा मात्र मिळालेला नाही.
मात्र प्रश्न केवळ गुन्ह्यांच्या संख्येचा नाही; पोलिस ठाण्याचा दरारा कुठे गेला? हा नागरिकांचा सवाल आहे. कथित अवैध व्यवसायांवर कारवाई होत नसेल तर त्यामागे नेमके कारण काय? पोलिस कर्मचारी, प्रभारी अधिकारी आणि कथित मध्यस्थांच्या भूमिकेबाबत सुरू असलेल्या चर्चांची वरिष्ठ पोलिस अधिकारी चौकशी करणार का, असा प्रश्नही उपस्थित होत आहे.
कायदा व सुव्यवस्था राखणे ही पोलिसांची प्राथमिक जबाबदारी असताना, नागरिकांच्या मनातच पोलिस प्रशासनाच्या भूमिकेबाबत संशय निर्माण होत असेल तर ही गंभीर बाब नाही का? असा सवाल नागरिकांकडून केला जात आहे.
या पार्श्वभूमीवर वरिष्ठ पोलिस अधिकाऱ्यांनी राजगड पोलिस ठाण्याच्या कारभाराची निष्पक्ष चौकशी करावी, कथित अवैध व्यवसायांवर धडक कारवाई करावी, पोलिस कर्मचाऱ्यांच्या भूमिकेची तपासणी करावी आणि हद्दीत कायदा व सुव्यवस्था अबाधित ठेवण्यासाठी कठोर पावले उचलावीत, अशी मागणी नागरिकांकडून होत आहे. काही नागरिकांकडून प्रभारी अधिकाऱ्यांच्या बदलीची मागणीही पुढे येत आहे.
दरम्यान, या आरोपांबाबत राजगड पोलिस प्रशासनाची अधिकृत भूमिका अद्याप समोर आलेली नाही. संबंधित अधिकारी, कर्मचारी किंवा उल्लेख केलेल्या पत्रकाराची बाजू उपलब्ध झाल्यास तीही प्रसिद्ध करण्यात येईल.
मात्र, राजगड पोलिस ठाण्याच्या हद्दीत नेमके चालले तरी काय? अवैध व्यवसायांवर कारवाई का होत नाही? आणि या चर्चांमागील सत्य काय? या प्रश्नांची उत्तरे आता वरिष्ठ पोलिस अधिकाऱ्यांनी जनतेसमोर स्पष्ट करणे आवश्यक असल्याची भावना नागरिकांमध्ये व्यक्त होत आहे.
