नसरापूर प्रतिनिधी विलास धोंगडे
भेलके महाविद्यालयात भारतीय संविधान दिन मोठ्या उत्साहात, अभिमानाने आणि देशभक्तीच्या भावनेने साजरा करण्यात आला. लोकशाही मूल्यांची जपणूक, विद्यार्थ्यांमध्ये संविधानाविषयी जागरूकता निर्माण करणे आणि सामाजिक-राजकीय घडामोडींवर विवेकपूर्ण दृष्टिकोन विकसित करण्याचा संदेश या कार्यक्रमातून देण्यात आला. कार्यक्रमाची सुरुवात संविधानाच्या उद्देशिकेच्या सामूहिक वाचनाने झाली आणि सभागृहात देशभक्तीचे वातावरण निर्माण झाले.
महाविद्यालयाचे प्राचार्य डॉ. तुषार शितोळे यांनी विद्यार्थ्यांना मार्गदर्शन करताना सांगितले की, “भारतीय संविधान हे केवळ कायद्यांचे पुस्तक नसून देशाच्या लोकशाहीचे प्राण आहे. बदलत्या काळात संविधानिक मूल्यांची जपणूक ही तरुणांची सर्वात मोठी जबाबदारी आहे.” त्यांनी विद्यार्थ्यांना संविधानाचा अभ्यास व व्यवहारात अंमलबजावणी करण्याचे आवाहन केले.
प्रा. सहदेव रोडे यांनी संविधानाने दिलेल्या हक्क आणि कर्तव्यांमधील संतुलन राखण्याची गरज अधोरेखित केली. तर प्रा. संदीप लांडगे यांनी डिजिटल युगातील आव्हाने, समाजमाध्यमांचा प्रभाव व जबाबदार नागरिकत्वाचे महत्त्व स्पष्ट करून विद्यार्थ्यांना जागरूक, विवेकी व सक्रिय नागरिक बनण्याचे प्रेरणादायी मार्गदर्शन केले.
कार्यक्रमात विद्यार्थ्यांचा सहभागही लक्षणीय होता. विद्यार्थिनी दिव्या मालुसरेने समानता, शिक्षणाचा हक्क, अभिव्यक्ती स्वातंत्र्य अशा संविधानाने दिलेल्या संधींचा उल्लेख करून तरुण पिढीने संविधान समजून घेण्याचे व प्रत्यक्ष जीवनात पाळण्याचे महत्त्व प्रभावीपणे मांडले.
या कार्यक्रमाचे आयोजन राष्ट्रीय सेवा योजनेतर्फे प्रा. दयानंद जाधवर यांनी केले. संपूर्ण कार्यक्रम प्रेरणादायी आणि शिस्तबद्ध वातावरणात पार पडला.
या प्रसंगी डॉ. रोहिदास ढाकणे, प्रा. सहदेव रोडे, प्रा. पौर्णिमा कारळे, प्रा. भगवान गावित, प्रा. जीवन गायकवाड, प्रा. संदीप लांडगे, प्रा. दयानंद जाधवर, प्रा. महेश कोळपे, प्रा. माऊली कोंडे, डॉ. गणपत आवटे, प्रा. भूषण समगीर, प्रा. अंकिता महांगरे, प्रा. वैष्णवी कोंडे, तसेच विकास ताकवले, शिवाजी सोनावणे, महेश दळवी, सीमा देशमुख उपस्थित होते. सुमित कांबळे आणि अभिषेक मोरे यांनी विशेष सहकार्य केले.
कार्यक्रमाचा समारोप प्रा. माऊली कोंडे यांच्या मनोगताने झाला. संविधान दिनानिमित्त आयोजित या उपक्रमामुळे विद्यार्थ्यांमध्ये संविधानाबद्दल अधिक आदर, जागरूकता आणि राष्ट्रभक्तीची भावना दृढ झाल्याचे समाधान व्यक्त करण्यात आले.
