नवीन वर्षाचे स्वागत सामाजिक बांधिलकी जपत करण्याच्या उद्देशाने सक्षम दिव्यांग संघटना, महाराष्ट्र राज्य यांच्या वतीने हवेली तालुक्यातील श्रीराम नगर येथील जिल्हा परिषद प्राथमिक शाळेत विविध सामाजिक उपक्रम राबविण्यात आले. या कार्यक्रमाचे आयोजन सक्षम दिव्यांग संघटनेचे हवेली तालुका संयोजक कुणाल चंद्रकांत मिठारे व अजयजी पुरंदरे यांच्या माध्यमातून करण्यात आले.
- या कार्यक्रमात महर्षी शिक्षण संस्था, कर्वे या नामांकित शिक्षण संस्थेच्या संचालकपदी अजयजी पुरंदरे यांची निवड झाल्याबद्दल त्यांचा यथोचित सन्मान करण्यात आला. शिक्षण क्षेत्रात त्यांनी केलेल्या योगदानाची दखल घेत उपस्थित मान्यवरांनी त्यांचे अभिनंदन करत पुढील वाटचालीस शुभेच्छा दिल्या. शिक्षण क्षेत्रात कार्य करणाऱ्या व्यक्तींचा सन्मान करणे हे समाजासाठी प्रेरणादायी असल्याचे मत यावेळी व्यक्त करण्यात आले.
तसेच नवीन वर्षानिमित्त श्रीराम नगर येथील जिल्हा परिषद प्राथमिक शाळेतील विद्यार्थ्यांना खाऊ वाटप करण्यात आले. लहान विद्यार्थ्यांना खाऊ मिळाल्याने त्यांच्या चेहऱ्यावर आनंद झळकला. सामाजिक उपक्रमांच्या माध्यमातून विद्यार्थ्यांमध्ये सकारात्मकता, आत्मविश्वास आणि सामाजिक जाणीव निर्माण व्हावी, हा या उपक्रमामागील मुख्य उद्देश असल्याचे यावेळी सांगण्यात आले.
कुणाल चंद्रकांत मिठारे यांनी सांगितले की, सक्षम दिव्यांग संघटना समाजातील गरजू घटकांसाठी सातत्याने विविध उपक्रम राबवत असून शिक्षण, आरोग्य व सामाजिक क्षेत्रात कार्य करत आहे. पुढील काळातही अशाच प्रकारचे उपक्रम हवेली तालुक्यात राबविण्यात येणार असल्याचे त्यांनी स्पष्ट केले.
या कार्यक्रमास शाळेतील शिक्षकवर्ग, पालक व स्थानिक नागरिक उपस्थित होते. त्यांनी या उपक्रमाचे कौतुक करत सक्षम दिव्यांग संघटना, कुणाल चंद्रकांत मिठारे व अजयजी पुरंदरे यांचे आभार मानले. नवीन वर्षाच्या निमित्ताने राबविण्यात आलेला हा उपक्रम सामाजिक ऐक्य आणि प्रेरणेचा संदेश देणारा ठरला.
